政壇：黎青龍獲最佳衣着獎
黎青龍橙黃色西裝襯陶瓷煲呔，手持「最佳衣着獎」獎座，星味滿瀉。
乙型肝炎權威、香港大學內科學系講座教授黎青龍嘅衣着風格一向大膽前衞，七彩西裝更係佢嘅標記。近日佢獲港大頒發四十二年長期服務獎。早排謝師宴，班醫科生特登頒多個獎畀佢，就係「最佳衣着獎」嘞！
黎青龍橙黃色西裝襯陶瓷煲呔，手持「最佳衣着獎」獎座，星味滿瀉。
黎教授嘅衣着就好似佢嘅人生寫照：永遠比人走得更快更前。呢位「神童」三歲讀小學，十六歲獲港大醫學院破格取錄，成為香港最年輕醫科生，同班有現任醫學院院長李心平，三年級已兼任講師，教番啲年紀仲大過佢嘅一年級生。
講都唔信，佢出年就六十五歲，難得佢由外至內都仲好年輕，佢話未諗過退休，亦一定唔會出私家市場賺大錢，因為佢無興趣做月球人、星球人（每月或每星期搵一「球」，即一百萬元），最希望三年後港大嘅黃竹坑私家教學醫院啟用。
至於佢點樣keep得咁fit，佢話平時無運動習慣，唔飲清水，只愛飲咖啡同健怡可樂，聽落唔太健康，但佢堅稱：「咖啡可以防老人癡呆o架！」
