政壇：工聯新丁自嘲零知名度
設計圖片及對白
工聯會離島區議員阿Bill鄧家彪，自舊年「升呢」做立法會勞工界議員後，旋即喺旺角開設議員辦事處，被指準備進佔九龍西做開荒牛，為下屆選舉由功能組別轉戰直選做定熱身。大半年過去，港大民調早前就立會議員嘅知名度調查顯示，竟然冇受訪市民噏得出佢個名。
設計圖片及對白
有消息話工聯會兩位長老陳婉嫻同「阿王」王國興嘅去留，將直選影響兩位勞工界「新丁」阿Bill同郭偉強，下屆有冇得轉戰直選議席。可惜嫻姐、阿王遲遲未扑錘，搞到兩位新丁非常忐忑。
講笑話做記者都唔錯
不過，阿Bill尋日同老婆、囡囡出席活動時，就同郭偉強口徑一致，聲稱可唔可以轉戰直選，甚至喺邊個選區插旗都冇話事權，講到明任由工聯會處置咁話。阿Bill仲自嘲喺全體議員之中，佢嘅知名度係「零」，都冇市民識佢，就更遑論打算喺邊區落戶喎。自稱「視政途如浮雲」嘅佢，仲話下屆有冇得選都冇所謂，況且大把出路，仲講笑話做記者都唔錯。
事實上，佢除咗喺標準工時、港鐵票價呢啲民生議題上，曝光率比較高之外，其餘時間的確唔多見佢嘅蹤影，加上佢一副四眼書生嘅形象，又唔似得建仔蔣麗芸靠把聲鬧出名堂，難怪新民黨葉劉淑儀舊年就試過將阿Bill叫錯咗郭偉強。被問到有咩招數「上位」，令市民認得佢，佢就話份人較低調，難聽啲講句就係「笨實」，除咗默默耕耘真係冇乜高招。
