自從2007年Facebook面世，呢個全球幾億人用緊嘅社交網絡真係徹底改變咗人與人之間嘅關係，同時亦都間接或直接地改變咗整個社會。喺個人層面嚟講，Facebook雖然令到朋友間可以更容易地連繫，甚至可以畀你搵得番失散多年嘅舊朋友、舊同學、舊同事、舊情人等，你亦同時可以透過Facebook知道你大部分朋友嘅近況同近照，包括佢食咗啲乜，去過邊度，溝過邊條仔，生過幾多個仔等等……但同時，Facebook呢單嘢亦令到友情虛擬化同網絡化。好多人覺得日日對住電腦，見住啲Facebook朋友，就以為真係見咗啲朋友。但喺現實世界，就連電話都唔多個，搵朋友食飯吹水都慳番，間接令宅男宅女數目加速增長。另一方面，Facebook或其他社交網絡，亦同時令吹雞動員變得更容易，甚至中東嘅「茉莉花革命」，亦係靠「飛卜推」而最後將政權推翻，你話Facebook係咪改變咗世界？

「飛卜推」係譯音類潮語，其實就係「Facebook推」嘅意思。網上有人專係鍾意將啲英文轉為中文字，其實玩譯音轉中文字，就好似「通勝」咁，有一部分專係教人讀英文嘅。例如英文One會譯作「溫」、Two會譯做「吐」、Three會譯為「飛」等等。網上又會有人寫做「飛士卜」，所以潮語「飛卜推」，就係指有啲人藉「飛卜」去「推廣」一些東東。可以用「飛卜推」嘅包括係商品、機構、服務、理念、政見、組織、文藝作品……甚至係個人自己，總之係推乜都得，有人LIKE就得。

既然今時今日Facebook嘅力量大到可以推翻一個政權，所以鄰近地區係絕對唔會畀呢啲境外勢力咁容易破壞國家和諧穩定。佢哋自己都有一啲類似嘅社交網絡，但只限強國自己塘水滾塘魚，連接唔到世界，但好處係方便監控，方便維穩。美帝想「飛卜推」向大陸？咪諗呀！你有個前中情局人員喺我哋手上o架！

第一手消息請下載on.cc東方互動iPhone/iPad/Android/Windows Phone Apps