政壇：搞搞政：「雷神」來港拍片Greg蘇即邀功
設計圖片及對白
政圈好興以「成功爭取」騷政績，正喺美國訪問嘅商務及經濟發展局局長蘇錦樑（Greg蘇），尋日就帶來好消息，原來喺電影《雷神奇俠》（THOR）扮演「雷神」嘅基斯漢斯禾夫（Chris Hemsworth）遲吓會嚟香港，事關由佢擔正嘅新戲稍後會到香港取景，據聞其中一場將會喺中環鬧市拍攝添！
設計圖片及對白
蘇錦樑（右）訪美期間與導演米高曼（中）及「雷神」基斯漢斯禾夫（左）傾談來港取景事宜。
Greg蘇雖然成功叨咗「雷神」光，但有人就提醒當局最緊要唔好「大細超」，吸納外國電影時，都要積極支持本地電影拍攝。
影視圈唔止一次批評港府怕麻煩，好多地方都唔敢借出嚟畀人拍戲，Greg蘇今次訪美，就好積極推銷香港，仲同美國著名導演米高曼（Michael Mann）同「雷神」短聚約二十分鐘。米高曼最近正拍攝新驚慄片，依家正喺洛杉磯取景，之後更加會到香港取景，所以Greg蘇就率先去探班打氣嘞！
