林鄭話已無意向商界勸捐,羅致光聽到都嚇咗一跳。

成立兩年嘅關愛基金,原本打算由政府同商界齊齊注資,可惜政府向商界撲水一直好困難,政務司司長林鄭月娥尋日出席活動時公然話已無意向商界勸捐,關愛基金專責小組主席羅致光聽到林鄭咁講都嚇咗一跳,急忙澄清關愛基金仍然歡迎商界捐獻,只係唔再積極揼商界心口啫!

林鄭話已無意向商界勸捐,羅致光聽到都嚇咗一跳。

林鄭尋日出席智經研究中心同社會服務聯會合辦嘅「扶貧及商界參與」論壇,致詞時話呢兩年啲人講起扶貧都會諗起關愛基金,可見關愛基金有存在意義,但佢同時又公開話無意向商界勸捐,而下周五則會向立法會財務委員會申請額外注資一百五十億元入關愛基金,加大扶貧力度。羅致光聽完林鄭嘅死心宣言後即刻出動兜番,仲呼籲商界扶貧唔止要出錢出力,仲應該出埋腦,諗吓計點樣喺扶貧市場搵到企業自己嘅角色喎!

第一手消息請下載on.cc東方互動iPhone/iPad/Android/Windows Phone Apps