政壇：羅蘭姐話立會「好灰」
設計圖片及對白
立法會位於添馬艦嘅新大樓舊年先入伙，無敵海景加上寬敞空間，好多甲級寫字樓都冇咁好條件。尋日立法會議員陳健波邀請幾名甘草演員去立會參觀，包括飾演「龍婆」入型入格嘅羅蘭、梁舜燕及黃韻材（原名黃允財）等。拍過多套靈異電影、今年已七十八歲嘅羅蘭睇睇吓，忽然有感而發，話立法會唔少牆身塗上灰色油漆，驟眼睇令人感覺「好灰」，好似前途一片灰暗，建議改用米黃等比較暖和嘅色系，相信會更加順眼。
設計圖片及對白
陳健波（左四）與鐘聲慈善社社長蕭思敏（左一）及甘草演員（左二起）劉桂芳、羅蘭、黃韻材、梁舜燕參觀立會。
開會冇厘正經
原來一眾甘草演員經常同鐘聲慈善社合作行善，而陳健波又同該社合作過，所以尋日邀請佢哋到訪立法會，戴頭箍、身穿碎花上衣嘅羅蘭笑言，佢出入片場、戲棚就多喇，但參觀立會就真係第一次，覺得立會大得超乎想像，大樓用色亦過於簡樸沉實。
羅蘭姐一句「立法會前途一片灰暗」真係嚇壞唔少人，睇番近年立法會嘅表現，流會、出席率低、問政水平低已經畀人鬧完又鬧，點知開會都冇厘正經，好似尋日立法會民政事務委員會討論香港嘅非物質文化遺產建議清單咁，一眾議員真係口沒遮攔，本來傾緊將辛亥革命、海員大罷工等事件列入香港嘅非物質文化遺產清單，但建仔嘅鍾樹根卻提出水蛇春咁長嘅騎呢建議，例如道教嘅扶乩占卜問事、喪禮上嘅破地獄儀式，甚至神打、問米、打小人都係香港特色喎！
佢講講吓，更爆句「三合會入會儀式都好特別，係咪應該保存？」之後至知講錯嘢，笑笑口補番句：「唔知保存咗會唔會犯法呢？」人民力量「慢必」陳志全搭嘴，話支持樹根建議將「打小人」納入非物質文化遺產，結果激到工業界林大輝就寸爆話：「咁『抽水』都係非物質文化遺產啦！」一眾尊貴議員就係咁高踞殿堂議政喇。
