耗盡積蓄焗回流 老無所依百般愁
香港人口日趨老化，港府照顧長者嘅政策亦不斷老化，同時代脫晒節，搞到唔少長者老無所依，徬徨無助。嗱，生果金同「廣東計劃」問題多多，甩甩漏漏，都唔知玩殘幾多老人家。
太一叮唔係亂噏o架，大家睇一單個案就會明白。八十六歲嘅王伯十幾年前帶住幾十萬元積蓄到東莞定居養老，一心諗住內地生活指數較低，可以安享晚年，點知時移勢易，物換星移，內地物價持續上升，生活水平幾乎已貼近香港，愈來愈「居不易」；加上王伯身體狀況轉差，醫藥支出壓力沉重，搞到積蓄幾近耗盡，莫講話頤養天年，家陣連溫飽都成問題，無可奈何之下，王伯只好回流香港。
問題嚟嘞，王伯返到香港生活拮据，梗係希望申請生果金幫補啦，之但係生果金政策有條相當食古不化嘅規定，就係任何人必須連續居港滿一年，至有資格申請，咁就玩殘唔少老人家喇！
時勢唔同，隨着內地生活指數不斷提升，老人家回流香港嘅個案必然愈來愈多，若然生果金政策唔與時並進，即係存心留難老人家啫。講白啲，如果身家豐厚，都唔使為慳幾個錢而到內地生活喇，港產官僚墨守成規，睇住老人生活艱苦都唔伸出援手，你話係咪涼薄吖。
嗱，安老政策與時代脫節，唔止生果金o架，仲有廣東計劃。大家未必記得，呢個計劃喺一一年施政報告提出，預計今年十一月推出，畀長居廣東嘅合資格港人長者毋須按規定返港住滿一定日數，亦可以領取生果金每個月一千一百三十五元。協助王伯嘅政黨批評，內地近年物價飆升，千幾蚊已經幫唔到長者幾多，膳食租金都唔夠，更遑論承擔高昂醫療支出，所以建議當局將每月二千二百元嘅長者生活津貼擴展至廣東計劃。
咁講啦，人體會隨着年月老化，安老政策一樣嘅咋。一個食古不化嘅生果金政策搞到回流老人徬徨無助，一個天殘地缺嘅廣東計劃又搞到北上長者望天打卦，港產官僚究竟係想安老，定係虐老吖！
滄海桑田，時代轉變，唯一不變嘅係港府安老政策幾十年如一日。敬禾得穀，敬老得福，子女再窮都應該孝敬父母，政府再窮都應該照顧老人，何況港府窮到只剩下錢？老人家為香港貢獻咗大半生，依家當敬老又好，當安老又好，區區一千幾百蚊生果金唔好同長者計到盡，好心畀公公婆婆安享晚年啦。今屆政府咪話要「穩中求變，適度有為」嘅，係時候表現誠意嘞，叮！
