SUN搞作：打橫嚟講：公務員再治港？咪玩啦！
香港行政會議成員陳智思，素有「公職王」之美譽，因年輕有家底，又愛參政（九八年起已做立法會議員，係服侍過三屆特首嘅行會成員），所以，被視為「下任」特首之熱門人選。
近日，有報章專訪大熱陳，問佢會否選特首，佢以父母反對為由，話暫不考慮，但卻拋出佢嘅睇法，認為家陣香港需要「公務員治港」，並點名只有位居「冧巴2」的林鄭，是最佳特首人選喎！
吓！今日咁嘅環境，仲講由「公務員治港」？上一件做咗四十幾年公務員嘅粉腸煲呔，全身流着的，就是公務員精煉的藍血：貪威縮骨、愛小便宜、陽奉陰違、怕蝕底執輸、好名爭功、官僚因循、推莊卸膊、目光短小、自卑而自大……唉！多講口臭！
今天的香港公務員，再不是十六年前那批，不管工作態度、行政制度、團隊精神，即使個人質素、思考能力，甚至品格德行，點比呀？
嗱！這兩日，因薪酬趨勢調查啫！班公務員為自己荷包，趁政府弱勢，毫不理會香港整體利益、形象和團結，以至政府威信，話翻枱就翻枱，呢啲就係「公僕」？公務員工會的小頭目在傳媒面前兇巴巴的吶喊，令人反感，叫人記起多次公務員的加薪幅度曾超過通脹，又在經濟衰退時，坊間大眾減薪扣錢，公務員仍穩坐釣魚船，福利如常，退休長俸不輟，依家竟輸打贏要，為錢唔理市民，仲話採取「不合作態度」？
陳智思撈政治久了，學懂滑頭蠱惑，佢補飛話若CY爭取連任，佢一定會支持，否則會撐林鄭。林鄭？搞掂班「市民公僕」至講啦！
彭志銘
次文化考古學家，對城中潮語有深入研究，博徵博引，廢官廢人行埋一邊。
