政壇：搞搞政：陳淨心嚇走跟蹤怪客
設計圖片及對白
愛護香港力量（愛港力）發言人陳淨心憑激情站枱指罵一招成名，紅到發紫，但煩惱亦跟住上門。佢尋日喺社交網站自爆，最近日日被幾個陌生男子瘋狂跟蹤，呢班男子跟出跟入，仲要坐的士追住佢架車十幾二十條街，佢停車，跟蹤嘅的士又停車，形迹可疑。陳淨心雖然表現強悍，但畀男人咁樣「死跟」法，都不免花容失色，最後要報警求助。雖然當時冇指罵對方，但陳淨心事後都喺網上警告：「如果我陳淨心少一條汗毛，警方可以從這車牌追緝兇徒。」強悍度絲毫無減。
設計圖片及對白
其實，當日警方接報到場之前，陳淨心嘅友人曾經上前拍打的士車窗，一窺跟蹤者全貌，又質問對方點解不斷死纏爛打。的士入面嘅人可能畀呢班護花使者嚇窒，一句聲都冇出就即時開車絕塵而去，陳淨心就趁機抄低咗跟蹤佢架的士嘅車牌，留低咗線索。
人民力量成員袁彌明早前曾飽受追求者滋擾，後來仲要鬧上法庭，事情才告一段落，今次會唔會係翻版呢？
