政壇：蘇慶和密搞飯局當熱身
蘇慶和
港府早前宣布領匯前行政總裁蘇慶和接任市區重建局主席，委任聽日起生效，據聞蘇慶和為咗同市建局中人打好關係，搞咗連場飯局，頭炮係尋日同較為資深嘅市建局非執行董事食飯，飯局歷時約一個鐘，共有七、八名市建局非執行董事出席，大家冇特定議題，主要係傾吓偈。有與會者事後比較蘇慶和同張震遠兩人，形容初步印象係蘇慶和為人比較低調，冇張震遠做事時主導性咁強。相信蘇慶和要一段時間認識市建局文化，先至會真正進入主席嘅角色。
蘇慶和
至於其他剛獲委任嘅十幾名市建局非執董，據聞蘇慶和會喺下禮拜初同佢哋食飯聚一聚。有市建局非執董話，本已認識蘇慶和，只係唔太熟，希望透過呢個飯局增進了解。蘇慶和同市建局中人連場飯局後，唔知會唔會同關注市區重建嘅團體多溝通，用實際行動洗脫外界話佢作風保守嘅批評呢？
