生活壓力如山 港爸難展笑顏

嗱，香港生活壓力大，一家之「柱」被壓到有氣冇碇抖，父親嘅笑臉真係愈來愈難見到o架。一項調查顯示，港爸開心指數不合格，以十分為滿分，平均只得三點九分，而壓力指數就高到爆燈，平均高達八點二分，當中八成一人坦言因為壓力大而出現失眠問題，四成五拒絕同人說話，甚至有三成人逃避歸家或者上班添，真係不能不令人嘆一句：叫父親太沉重！

子女成績唔合格，有父親教導同安慰，父親開心指數唔合格，又有邊個明白同支持呢？正如學者話齋，父親嘅角色壓力大，如果負面情緒長期抑壓，對身心健康都有不良影響，建議為人父者以輕鬆態度面對生活，平日應該笑多啲咁話。

唉，其實港爸唔係唔想笑，而係實在笑唔出啫。無錯，做人應該輕鬆面對生活，之但係香港生活壓力愈來愈沉重，樓價飆升，租金高企，百物騰貴，柴米油鹽樣樣加價，衣食住行百「費」待興，家陣連傳統名校都紛紛因「財」施教轉直資，你話嘞，今時今日要養妻活兒，點樣可以輕鬆吖？呢，日前之嘛，一名顧家好爸爸為咗賺多兩個錢養家，連日加班搞到勞累過度，結果同家人晚飯後一睡不起，真係聞者傷心。

一句講晒，香港爸爸難歡笑，皆因港府太不肖。嗱，八年「建華之亂」固然難頂，經濟低迷，失業率高企，遍地負資產，害到全港男士無日好過；而前特首曾蔭權「禍港七年」更加惡啃，官商勾結，施政無能，搞到樓價與物價齊飛，經濟共管治失色，一家之主工時長，搵食難，所承受嘅壓力隨時比以前有過之而無不及。試問喺咁嘅環境之下，邊個能夠笑得出呢？

高官話喎，父親節將至，為人父者千祈唔好因公忘私，要撥出多啲時間陪伴家人。其實計太一叮話齋，唔該當權者提醒管治班子，千祈唔好因私忘公仲好啦。有辦大家睇，就係因為貪曾同前廉政專員湯顯明之流一味掛住以公謀私，敗壞朝政，先至搞到香港烏煙瘴氣，港爸難展笑顏咋！　

父親對子女無私奉獻係一種幸福，但面對港府嘅無能施政就係一種折磨。咁啦，各位港產官僚，唔好再做無良父母官嘞，由今個父親節開始，生性做人，改善施政，等父親們安居樂業，重展笑容啦，叮！