政壇：搞搞政：阿忠帶學生去立會補課
設計圖片
立法會議員梁耀忠（阿忠）喺香港仔工業學校任教高中數學科多年，年屆六十嘅佢將會喺暑假正式退休，前日就同學生上最後一堂。平日唔多聽書嘅學生面對呢位退休在即嘅梁Sir，都罕有舉手答問題，臨別前更全班起立敬禮，搞到阿忠眼濕濕。阿忠都知班學生對讀書興趣唔大，過去搞補課叫極都唔郁，仲試過出撒手鐧，帶學生去立法會辦事處補課。嘩，呢招似乎有啲公器私用喎！
設計圖片
但絕招一出，啲學生聽到可以去立法會補課，當堂醒神晒，仲爭住報名。阿忠話佢嘅「雙料」身份，方便帶學生參觀同了解立法會運作之餘，仲可以闖入樓上議員辦事處呢個一般訪客嘅禁區補課。
其實阿忠自九五年加入立法局，議員身份有冇拖累佢嘅教學工作？阿忠自言執教鞭三十年，只係請過兩日病假，事假就更加冇請過，長期服務獎都攞咗幾個喇！雖然據講阿忠喺上屆立法會大會出席率達百分百，但去年就成為唯一冇提出過任何動議或修正案嘅直選議員。如果阿忠下屆想再選，退下教育火線後就要勤力啲喇！
