政壇：港大校友馬場相見歡
徐立之（中）送港大銀色校呔畀陳南祿（左）及廖長江（右），三人「同呔同氣」。
沙田馬場尋日有場「港大校友會挑戰盃」賽事，名人同港大校友踴躍出席，連港大飯堂嘅三嫂都在座。馬會大董陳南祿（Philip）以一身港大Look到場，恤衫上係一對全球數量不足五十對嘅港大校徽袖口鈕，又打咗條銀色領呔，呢條呔同另一馬會大董廖長江，以及港大校長徐立之嘅款式撞到應一應，但班港大校友撞到好開心。
徐立之（中）送港大銀色校呔畀陳南祿（左）及廖長江（右），三人「同呔同氣」。
徐立之話，兩位馬會大董嘅領呔係佢送嘅，呢條銀色校呔係多年前由港大校友事務處設計生產，當時有意見認為呢條校呔予人感覺過於年輕，有欠穩重，反應亦唔理想。徐校長只係要咗幾條滯銷校呔存放家中，打算日後當禮物贈予友人。早前徐校長戴住呢條銀色校呔出席賽馬會社群盃賽，在場賓客好鍾意，紛紛向佢索取，可惜佢家中只剩兩條，最後Philip同廖長江先到先得，所以尋日咪撞呔囉！
