政壇：公僕調薪 梁籌庭早聞燶味
梁籌庭
公務員團體相繼表明不滿薪酬調整結果，仲有人發現機制漏洞處處，高級公務員協會下周會邀約其餘高級公務員代表開會，商討聯署去信特首要求啟動仲裁機制研究加幅結果。據講局方亦不敢怠慢，今日就約埋機制以外嘅四個工會當面交代加薪安排，一改以往只致電知會嘅做法。
梁籌庭
機制以外嘅公務員工會聯合會總幹事梁籌庭話，佢一早就聞到燶味，因為政府年初已放風今年加薪會受公司花紅拖低，仲呻話公務員多福利嘅日子已經冇咗好耐。講得俗啲，依家公務員嘅福利就好似「一碟乾炒牛河，乜叉都冇」。佢建議行政會議成員喺決定加薪時，應該直接同公務員交流，了解吓公務員嘅諗法。
高級公務員協會主席郭志德尋日就喺電台節目上話，私人機構除咗有現金花紅，仲會以股票期權等形式發放花紅，所以公務員調薪機制要與時共進。至於點解佢哋喺加幅唔理想嘅時候先發現呢個漏洞，郭志德就好坦白話，過往經濟環境好，令佢哋仲未有警覺性，但今次結果出爐時，佢哋就覺得唔多妥，之不過當日一時反應唔切喎。
