教育產業遺禍 貪曾誤人子弟
十年樹木，百年樹人。教育係一項長遠投資，就好似種樹咁，要令樹木茁壯成長，成為棟樑，除咗要有肥沃土壤，更加要悉心栽培。香港嘅高等教育一向口碑唔錯，大學排名亦唔低，曾培養出唔少棟樑之材，可惜前朝貪曾政府鼠目寸光，唔只唔重視高等教育，仲將教育當成產業，一味向錢看，搞到教育質素不進反退，競爭力每況愈下。
聽吓教育界人士點講吖。身為中文大學數學科學研究所所長嘅國際知名數學家丘成桐，日前炮轟特區政府喺大學教育方面冇花好多工夫，比回歸前港英政府更唔重視教育；佢仲點名批評前特首曾蔭權爵士覺得高等教育可有可冇，認為大學生花納稅人咁多公帑，不如畀現金券送學生去哈佛好過。正因為貪曾政府眼高手低，窒礙高等教育及科技產業發展，丘教授擔心隨着內地環境轉變，香港將會失去優勢，想成為科技中心都幾難。
正所謂，崩口人忌食崩口碗。貪曾本身未讀過大學，只因時來運到，回歸前受到英國主子青睞，仕途一帆風順，回歸後又冷手執個熱煎堆，接替腳痛落台嘅老董而坐上特首寶座，佢唔重視教育，認為高等教育可有可冇，除咗證明佢鼠目寸光，亦證明佢心胸狹窄。佢自己讀唔到大學，亦唔想其他人讀大學，你話係咪自私吖。
係人都知，喺呢個講求知識嘅年代，教育及人才係最重要嘅，冇優良教育，冇可能培養出優秀人才，而冇優秀人才，香港就冇前途。正如丘教授話齋，本港大學比台灣、南韓優秀，亦有一流人才足以發展科技，可惜貪曾政府對科技採取自生自滅態度，導致香港競爭力不進反退。
最不知所謂嘅係，貪曾好大喜功，口口聲聲發展教育產業，搞教育好似做生意咁，學校淪為學店，學生變成提款機，尤其係副學士課程良莠不齊，濫竽充數，簡直係誤人子弟。仲有吖，喺港府放任之下，近年愈來愈多學校轉為直資，學費愈來愈貴，將貧窮子弟拒於門外。貪曾政府嫌貧愛富，寧願資助英國貴族學校，都唔願花多啲資源喺基層子弟身上，唔怪得跨代貧窮不斷惡化喇。
咪話太一叮唔提醒，唔想香港繼續沉淪，港府就要盡快撥亂反正，首先叫停教育產業，然後為高等教育投放更多資源，千祈咪學貪曾咁短視吖，叮！
