SUN搞作：打橫嚟講：黃膠鴨收皮的文化分析
上帝創造萬物，每件東西或事情，即使不甚起眼，但一定有它的存在意義，有它的在世價值。不論好壞！
那隻黃澄澄的大膠鴨，在香港停留逾一個月，終於「收皮、摺埋」，告別香江。
當近八百萬人流曾湧到老尖海旁影相打卡，大家可有思索吓是次活動的意義、價值和好壞呢？
本是一項商業行為，卻老作為藝術展覽，在聽慣大話的謊言社會，人民耳膜生繭，再不理真假了！反正真與假也無損一家大細喜孜孜一窩蜂無執輸的趁熱鬧，人有你無（去過），係好無面的！係跟同類型的好友無偈傾的！係out咗的！係會悶悶不樂的！
連該黃鴨的製作者（佢被褒到話係設計師、巨鴨之父），那荷蘭佬都覺得驚訝，去勻全球都未試過今劑香港咁瘋狂，噢！呢個集體文化現象，係有得解釋的：首先，呈現咗呢度啲人，係幾咁苦悶。當佢哋平日再無地方好去，例如新界郊野逐漸屏風樓化、沙灘污染嚴重、單車徑高度危險，甚至商場行到無新意時，只要有倒瀉屎唔臭的話，都「貢」過去（目及）吓！其次，只要被宣傳呃到，無思考的人，便去合家歡囉！佢哋寧願唔諗嘢，逃避現實的殘酷，不想知道劉曉波老婆個細佬做乜被人監禁重判囉！
黃鴨的下場，叫人痛心，那夜當夠鐘收工，竟即場放氣，成pat皺皮塌在人前，用完即棄。唉！何解唔好似當日，用船拖回青衣才有體面地「收皮、摺埋」吖？這是公務員式按機制辦事的思維，夠鐘就收工，話知你乜叉文化、價值和意義。
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
