設計圖片及對白

父親節將至，上月底榮升外父嘅立法會議員田北辰（田二少）尋日出席一個電台節目時大談為父之道，田二少話佢嘅好爸爸秘訣係公正、唔好偏心，仲寄語父母們千祈唔好偏袒任何一個。講到呢度，佢仲煞有介事提到自己家族就係因為有人偏心而令大家都唔開心。唔通田二少暗示當年父母偏心，令佢同大佬田北俊（田少）一度冇偈傾？

設計圖片及對白

田二少有咁大體會唔係冇原因，記得佢剖白過同田少間嘅兄弟情，佢話細個嗰陣大佬好錫佢，可惜佢六、七歲起開始好百厭，而父母總係幫住佢而令大佬成日被迫「食死貓」，搞到兩兄弟關係愈來愈疏離。直至二十年後，大佬專程飛去美國搵佢傾家族生意，兩兄弟喺沙灘漫步兼真情剖白三個鐘，先解得開呢個長久嘅心結。唔怪得田二少堅持對四個仔女都一視同仁喇！

星期日就係父親節，佢哋一家會總動員陪田二少食至愛嘅西餐，食鵝肝、飲羅宋湯對佢嚟講係樂事，但鍾情中餐嘅田太太就要犧牲吓啦，呢一日爸爸至大呀嘛！

第一手消息請下載on.cc東方互動iPhone/iPad/Android/Windows Phone Apps