政壇：醫管局貿發局換班大戰
市區重建局因為商品交易所事件而要換人後，下一輪將輪到醫院管理局主席胡定旭同貿易發展局兩位主席因任期滿而要換班。有消息話剛辭去馬會大董嘅醫生李國棟及行政會議成員李國章，會係醫管局主席熱門人選。至於貿發局主席之位，有傳係恒隆集團董事總經理陳南祿（Philip）及工業界立法會議員梁君彥爭奪，佢哋背景各異，所以人選誰屬，又傳疑似梁營同唐營之爭。
港府一向有不成文嘅「六六規定」，即一位社會人士最多出任六項公職，出任某項公職以六年為限，但醫管局嘅胡定旭由○四年開始做，去年底再獲延任一年，前後達九年之久，所以繼任人早傳曾任中文大學醫學院院長嘅李國章出任，一來李係梁營中人，加上資歷同經驗都同醫管局脗合，所以行情看漲。但亦有消息話，○六年至去年底出任醫管局成員嘅李國棟都有機，佢喺肥胡手中接任智經研究中心主席，會唔會接埋醫管局嗰位呢？
由○七年開始出任貿發局主席嘅蘇澤光任期將於九月底屆滿，身在紐約嘅佢尋日話，政府至今未曾同佢接觸，但佢強調會「接受任何命運安排」，又指任期不應超逾六年嘅原則應貫徹執行，暗示會接受離任安排。繼任人方面，恒隆集團董事長陳啟宗係忠實「梁粉」，佢嘅屬下陳南祿因此被看高一線，至於唐營就盛傳多人都有興趣，包括商界立法會議員林健鋒及梁君彥等人，認真係爭崩頭。
