政壇：區會領袖數臭貪曾
設計圖片及對白
政治係眾人之事，但好多從政者識講唔識做，有啲可能連講都唔識添！特區政府要掌握地區民情、摸地方脈搏，唯一途徑就係十八區區議會，但走勻十八區實在耗時，所以政府高層同十八區區議會正、副主席會面交流就變咗一個重要捷徑。但貪盡海陸空、歎盡省港澳嘅前特首曾蔭權爵士落台近年，啲地區領袖講起佢仲係好不滿，直指貪曾對地區冇誠意，有事就識落柯打，冇事就一年見一次。貪曾咁樣，算唔算打完齋就唔要和尚呢﹖
設計圖片及對白
卸責區議會
貪曾在任時出名小器兼霸權，有地區人士批評，貪曾淨係識得點到班區議會正、副主席陀陀擰，佢在任時每逢公布施政報告，先會同各區主席見一次面，而且每次都好似係為咗要向佢哋落柯打咁。最難搞嘅一次係叫十八區每區各搵地方建骨灰龕，雖然話香港有咁嘅需要，但地區邊有能力突然搵啲合適、又獲大多數居民支持建骨灰龕嘅地方吖！咁樣將個波拋畀區議會，即係大石壓死蟹，要啲民選區議員難做喎！
今昔有對比
啲地區人士唔係秋後算帳o架！佢哋話現屆政府經常提及地區行政、下放權力等，高層又不時同十八區正、副主席會面。有人話，唔好理特首梁振英會唔會參考佢哋啲意見，但起碼真係有攞起支筆同簿去寫低啲意見，似係肯聽咁話。例如喺政府撥款一億元去「地區重點項目計劃」、巴士線重組計劃，以及有關本港土地房屋問題，佢都有同十八區正、副主席見面傾過。甚至喺政府建議擴建堆填區之前，都有搵佢哋講吓點樣改善地區衞生環境，所以地區人士先有今昔對比嘅諗法。
香港政治架構簡單，要掌握民情，除咗立法會、政黨外，區議會就係最好嘅平台，好似貪曾咁有事鍾無艷、無事夏迎春，真係鬼睬你囉！
