盲招客不勝負荷 旅發局不合時宜
變幻才是永恒，呢個世界無嘢係永遠一成不變，個人遊就係例子。內地同胞蜂擁而至，香港人以前眉開眼笑，今日愁眉深鎖，無他嘅，小小嘅香港根本無法承受內地嘅龐大客源。長此落去香港就算唔陸沉，單係中港矛盾都頂唔順啦，所以咯喎，官老爺急急煞停非深圳戶籍居民一簽多行，狠下心腸將財神爺拒諸門外。
好嘞，民心思變，旅遊政策時移勢易，不過有人似乎無與時並進喎。講緊邊個？咪旅遊發展局囉，大鑼大鼓舉辦一項名為「香港夏日盛會」嘅推廣活動，話要吸引旅客來港體驗夏日無盡精彩喎，仲話預計今個夏季旅客人數會比上年同期上升百分之五至八添，睇嚟香港人今個夏日應該進一步體驗到無盡逼爆嘅滋味嘞。
吸客掘金係要嘅，不過都要審時度勢，家陣香港被人滿之患搞到頭昏腦脹，你仲敲鑼打鼓叫多啲人入嚟，咪令問題雪上加霜？如果又搞到中港居民藥房爭奶粉，沙灘爭空間，火車爭位坐，甚至我鬧你蝗蟲、你鬧我係狗嘅丟架一幕再次上演，盞畀「本土派」有大條道理鼓吹香港同內地切割關係o架咋，萬一攪亂香港管治嘅大棋局，小小一個旅發局孭唔起o架咋。
再講吖，官老爺呢頭請深圳同胞食閉門羹，嗰頭打鑼打鼓開門吸客，你話係咪思覺失調吖？家陣嘅問題唔係旅客唔夠，而係旅客太多呀，懵丙！
唉，講起都無奈。其實有錢邊個唔想賺吖，問題係有本事賺至得o架咋，個人遊實施咗十年，官老爺就魂遊太虛咗十年，住宿、交通同景點等旅遊配套容量十年如一日，根本追唔上旅客上升速度，盲目追求旅客增長盞遲早爆煲o架咋咋。所以話，對於夏季旅客預期增長百分之五至八，官老爺應該感到憂心，而唔係開心，畢竟呢隻鑊係你哋搞出嚟。如果由於本港接待能力超出負荷，再次爆出旅客被迫露宿街頭醜聞，你哋一定走唔甩o架咋。
話時話，講到不合時宜，何止係旅發局招客活動，旅發局本身就係一件過時產物啦。旅遊業當務之急係提升設施，改善服務，宣傳吸客變成次等任務，咁旅發局咪變咗一個只供擺設嘅花瓶？嗱，花瓶都可以供人觀賞，但係旅發局成日爆出大花筒醜聞，簡直不堪入目，唔使搞乜嘢香港夏日盛會，市民諗起都心火盛呀！
不如咁啦，如果港府唔介意旅發局盲目吸客，索性搵黃色橡皮鴨做主席，起碼夠正氣，兼夾能夠散播快樂同正能量，就算政策不合時宜，市民條氣都順啲吖，係咪？
