呢兩日，各大小傳媒，都有報道旺角西洋菜街（即行人專用區）的新聞，除因為有人參加悼念李旺陽集會被襲擊，用「齊心型」的摺櫈打穿頭之外，還有喺呢條街上，晚晚擺檔唱歌搵錢的樂隊，被控告使用的擴音器太大聲，造成噪音煩擾罪。

現今，呢條行人專用區街道，已無王管的了！法例話明唔准小販無牌經營、唔准阻街、唔准嘈吵，但偏偏仍有人無視法紀。而香港政府廢柴弱能，警察又只心向「退出薪酬趨勢會議」，為發財而搞寸紀律部隊機制，根本就無人執法，無人理呢條街死活。

本來，一檔檔小販，尤其電訊商的檔口，及一堆堆樂隊阻塞道路，喧嘩嘈閉，早已證據確鑿，違法到唔違法啦！但硬係唔明，法庭仲話告佢哋唔入？

日前，有兩隊樂隊被控上庭，以《噪音管制條例》告佢哋噪音煩擾罪，被告否認控罪，話警方執法沒客觀標準，原來，警方無用儀器量度聲量，只說：「我唔需要分貝機，我隻耳仔覺得超過聲浪就可以告你！」唉！不單只警權無限大，還顯得該差人低質兼無知，明明啲聲浪大到附近二十樓居民閂密晒窗都被嘈到瞓唔着，咁有利成功檢控的Case，都會被反咬一口，你話咁嘅水準，仲想「加人工」？

嗱！即使噪音煩擾罪告不成，但阻街、無牌經營（收錢），也犯緊法啦！咁都無罪？香港仲有法治嘅？吖！香港的政治又確實有點問題，煲呔貪曾、醉湯、商交所事件、有人僭建……好多好多大案，都好似靜晒嘅？博人唔記得？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps