政壇：政商定格：棋聖聶衞平轉戰橋牌賽
聶衞平（右）全神貫注應付牌局，與對手鬥智。
睽違香港十六年嘅亞太橋牌聯會錦標賽上周五喺港島一間酒店舉行，來自內地、澳洲、印尼、台灣及泰國等近四十支勁旅齊集，有「棋聖」稱號嘅內地第一圍棋高手聶衞平、行政會議成員陳智思嘅姑姐陳鳳翎（Esther）等名人都現身參戰。東道主香港橋牌協會主席單偉彪話，今次勝出隊伍將取得世界盃橋牌賽入場券，希望港隊有機會取得席位。
聶衞平（右）全神貫注應付牌局，與對手鬥智。
開戰首日，盛產世界冠軍嘅中國隊最受矚目，包括女子隊世界冠軍王文霏、馮學鳳及閻茹等。近年着迷於橋牌嘅聶衞平參加長青組賽事，中場休息時佢透露依家打橋牌多過下圍棋，唔通佢難尋敵手，所以改玩橋牌？聶衞平好謙虛話唔係，事關捉棋時用腦力計算太多，太攰喇，所以咪玩多啲橋牌囉！記者見佢一邊傾偈，一邊若有所思，好似仲未抽離牌局，「棋聖」認真唔易做。香港有三支隊伍出賽，包括友邦保險非執行主席謝仕榮、新聞處助理處長林羅寶蓮及老公林蔭等人。
