政壇：搞搞政：曾鈺成事先張揚「裸退」
設計圖片及對白
今屆立法會好多界別都新人上陣，主席曾鈺成透露，下屆佢都會退下，議會實更多新面孔。六十六歲嘅曾鈺成話佢會「裸退」，唔參選立法會外，亦唔會角逐特首。點解提早三年宣布金盆洗手？曾鈺成話希望他日塵歸黃土，市民對佢仲存有幻想，想像下佢做特首可能幾好喎，好過勉強做特首，「跟住哎唷，仲以為佢好掂，原來仲差，咁就死啦！」
設計圖片及對白
決定「裸退」唔容易，但曾鈺成認為若果打算再參選，講嘢就會有太多顧慮同包袱，加上一七年自己都成七十歲，「選乜鬼？」可能就係因為冇晒顧慮，佢作為立法會主席講嘢都愈嚟愈放，政改、佔中都毫不迴避。
曾鈺成認為佔中係小事，佢只擔心政改原地踏步， 「如果解決到一七問題、如果佔中帶頭人亦滿意一七嘅安排，就冇佔中。如果搞唔掂，就唔止佔中咁簡單……」佢又話，建制派中人認為搞唔掂咪冇普選囉，有乜咁大不了？佢就覺得唔係，如果一七搞唔掂，香港好難管治，又話香港人好務實，無理由搞唔掂。唔怪得佢自言，「整整吓我好似變咗民主派」。
