政壇：高調派糉黃碧雲自打嘴巴

選舉論壇上，泛民成日都用蛇齋餅糉嚟攻擊建制派，尤其係循民選嘅建制派候選人，話佢哋以蛇宴、齋宴、甚至派餅派糉嚟籠絡選民，就連政府喺施政報告宣布預留二十億元畀全港十八區推行「社區重點項目」，都畀泛民議員攞嚟鬧。立法會議員黃碧雲（一舊雲）更上綱上線，話擔心政府撥款會淪為向建制派輸送「官方贊助嘅蛇齋餅糉」，端午將至，一舊雲卻親身示範乜嘢叫鬧得最甘、做得更徹底。

一舊雲尋日急不及待趕喺端午節前夕派糉畀一班愛民邨街坊，仲慌死人唔知咁喺社交網站宣傳。如果佢送暖到社區，點解淨係揀愛民邨呢？唔通前年區議會選舉喺呢區輸咗嘅一舊雲，咁早已經開始為下屆區議會選舉發功？好心佢以後唔好再鬧人蛇齋餅糉喇，否則盞自打嘴巴。