政壇：兒戲訪水警 議員似遊客
設計圖片及對白
立法會議員不時因應工作需要落區或去部門參觀，增進對部門工作嘅認識，為撥款把關。好似保安事務委員會繼上月底參觀過消防處後，尋日又到訪西灣河水警總部，獲安排觀看俗稱「山貓」嘅高速追截艇進行演練，有份出席嘅議員口口聲聲要親臨前線、了解水警工作，但全程就有如遊客咁兒戲，好似水警人員施放照明彈、催淚彈配合海上阻截大飛嘅行動咁，本來硝煙滾滾、氣氛十分緊張，但議員揀喺日頭參觀，大太陽下只睇到一陣煙霧，正宗嘥武器嘥公帑，好心咪搵納稅人笨喇！
設計圖片及對白
24委員僅七人出席
尋日委員會參觀水警總部，二十四名委員中只有七個出席，泛民更只得擔任委員會副主席嘅涂謹申出席，其他仲有林大輝、姚思榮、鍾國斌等，主席話此行係要更貼身了解前線水警嘅運作，但參加議員唔多，負責接待嘅水警就展示多艘艦艇畀佢哋睇，又講座又演練，真係好認真。耗用最多資源嘅唔使問係演練，只見兩艘「山貓」先投放照明彈對付隻模擬「大飛」，再施放催淚彈夾擊，一時間黃煙四散，場面好逼真。
參觀嘅議員都入晒神，有啲仲好雀躍咁用手機同相機影相拍片，但水警演練涉及好多資源，點解議員唔可以搵個更有利嘅時間參觀呢？譬如天黑啲嘅時候，咁樣照明彈先可以發揮作用，更好嘅方法係隨同參加一個例行嘅海上反走私活動，咁樣照明彈、催淚彈最少可物盡其用，唔使好似放煙花咁呀！
口痕友話齋，做立法會議員真係幾過癮，上次佢哋參觀消防處，個個試着「黃金戰衣」，影張雄赳赳嘅相，今次又可以做特殊遊客，睇山貓對大飛嘅演練，有乜旅行團可以咁多嘢玩呀﹖
