血淋淋盡收眼底 跟白車兒童不宜
血腥暴力電影之所以同鹹片睇齊，同列兒童不宜三級類別，一律嚴禁十八歲以下人士觀看，皆因大家都係賣肉。香艷畫面賣嘅係肉體橫陳，而血腥鏡頭賣嘅係血肉模糊，對心智未成熟嘅青少年嚟講，一樣係荼毒心靈。試諗吓，啲未成年人望到血肉橫飛嘅恐怖場面，成長階段就算唔搞到心理變態，都隨時晚晚發噩夢啦。
點解太一叮今日咁擔心青少年受血腥鏡頭影響心智發展呢？無他嘅，因為消防處正在製造機會畀青少年觀看恐怖場面，仲要係血淋淋近距離接觸嗰隻，實在好難令人唔擔心囉。
係咁嘅，消防處為咗響應「家是香港」運動，正籌辦一個名為「救護先鋒隨車觀察計劃」嘅活動，邀請十三個青少年制服團體嘅十四歲或以上青少年會員參加，名額三百個，安排由八月十九日至九月一日期間喺十三間救護站每人跟隨一輛救護車出勤，朝九晚五觀察一日，話希望參加者藉此拓闊視野喎。
即係咁，為青少年拓闊視野唔係話唔好，不過救護車工作特殊，最怕連青少年唔適合觀看嘅場面都盡收眼底啫。救護車去到邊，參加者觀察到邊，如果奉命搶救嘅案件係明星困升降機或者孕婦作動就話無問題啫，萬一係滅門慘案之類嘅大災難咁點算先？你知啦，本港早前先至發生咗幾單倫常慘劇，唔係逆子殺父斬母，就係狼婦將浪子肢解碎屍，兇案現場血腥暴力，場面分分鐘比「人肉叉燒包」更恐怖，絕對係兒童不宜o架！
血腥暴力嘅三級片都要十八歲至睇得啦，更何況係令人毛骨悚然嘅慘案現場？十幾歲，卜卜脆，一顆顆幼嫩心靈仲係好脆弱o架咋，能唔能夠承受咁刺激嘅場面呢？消防處高官究竟有無深思熟慮呢？青少年就話好多心智未成熟啫，但係你哋唔細o架啦，係咪應該時刻保持警覺，盡力保護幼小心靈不受損害呢？
青少年跟白車出勤，問題唔止幼小心靈隨時受驚嚇，搶救工作一樣可能因而造成驚險場面。正如有前線救護員憂慮，部分參加者欠缺專業救護知識，萬一救護員爭分奪秒搶救傷者之際，仲要分心照料參加者，咁就跟車變阻車o架嘞。嗱，消防處救護員會主席陳仕祺就有咁嘅擔憂：「出車唔知下轉去邊o架嘛，如果係大意外，斷手斷腳，血肉橫飛乜都有，都唔知點照顧參加者！」
不如咁啦，消防處避免好心做壞事，喺未推行計劃畀青少年拓闊視野前，先自己睜大對眼檢視下計劃先啦，叮！
