三個香港警隊工會聲稱不滿薪酬趨勢調查方式，憤然決定退出機制會議，這擺明輸打贏要的鹵莽愚蠢行為，引來全港七百萬人指摘，無腦兼攪亂香港。

唉！一直都話咗，回歸後的香港警方高層，全是奴才鷹犬、沒個人意志的傀儡，對付手無寸鐵的學生或平民就兇狠，要佢哋去諗嘢？就「碌銀」囉！

在公務員團隊內，警隊的福利條件，一直較其他的優厚，人家有無異議吖？大家皆明白警隊工作的重要和困難。好警察從來都受尊重的！

哼！家陣為了薪酬，未傾就翻枱，露出有牌爛仔本性？嗱！每一工種，總有它獨特的mentality（唔識解就查字典啦！）。消防員上班首要為救人；教師為作育英才，同樣，警察的本質，係執法，維持秩序。要搵錢？請轉行囉！

一份工作的最大價值，不是從薪金多寡之反映，而係「社會責任」。警察哥哥仔，你哋明唔明o架？紀律部隊係守衞社會紀律的，即使並非差人，也應懂不該攪亂社會秩序啦！

今天，香港警隊大陸公安化，不顧香港整體利益，高層貪污醜聞日趨繁多，又惡形惡相不得民心，形象衰敗，全是管理不善所致。現警隊工會竟趁廢柴政府虛弱之時多踩一腳？好不仁不義，令關二哥無面啫！嗱！一係咁！你哋可以話退出會議的原因，係同內地公安一體化咗，願意以大陸公安的薪金作準，咁，我哋就唔再話你哋紀律部隊無紀律囉！如有腦的話，諗諗啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps