政壇：政商定格：捧億元珍品游錦榮標汗
價值達億元嘅乾隆琺瑯彩十八羅漢水注，價值媲美一層豪宅，吸引李永康睇到入晒神。（被訪者提供）
香港山西商會副會長兼智道總會主席游錦榮（Anthony）從事製衣生意逾二十年，近年將收藏嗜好變成一門生意，去年同香港青聯前副主席李永康喺深圳開設中國首間民企文物公司，其中一件國寶級藏品，係明朝正統年間三幅放喺王家寺廟供奉嘅佛教壁畫，畫工精細，吸引富豪北上「朝聖」，更有人出天價五億港元，欲據為己有，但呢件係國寶唔賣得。
價值達億元嘅乾隆琺瑯彩十八羅漢水注，價值媲美一層豪宅，吸引李永康睇到入晒神。（被訪者提供）
有人認為王族文物具有「帝王之氣」，愛收藏清朝之瓷器嘅Anthony就相信珍稀文物既有「貴氣」，亦有「雅氣」，蘊含歷代帝皇嘅喜好同生活習慣。咁邊類古董瓷器最受富豪歡迎？原來首選係康熙、雍正及乾隆年間嘅珍品，好似一個手掌咁大嘅乾隆年間霽藍釉描金琺瑯彩十八羅漢水注，身價高達一億港元，Anthony將佢捧喺掌心供貴客鑑賞，緊張到手心冒汗，笑言若唔小心打爛咗，賣身都唔掂喎！
