政壇：政商定格：唐唐陪妻女行街享天倫
唐英年（中）陪伴太太郭妤淺（右）與囡囡（左）揀護膚品，全程翹埋手。
全國政協常委唐英年（Henry）同太太郭妤淺雖受大宅僭建官司纏身，卻無損聚天倫心情，尋日下晝三點半，Henry拖埋太太及囡囡一行三人現身金鐘廊Shopping，Henry着住少見嘅灰色風褸襯恤衫，囡囡就穿上時下後生仔最愛嘅爛牛仔短褲，大晒長腿。只見手拎一袋韓國護膚品嘅唐小姐，行去一個美國護膚品專櫃，拎起一瓶面膜左睇右睇，又細心聽售貨員介紹。
唐英年（中）陪伴太太郭妤淺（右）與囡囡（左）揀護膚品，全程翹埋手。
妻女興致勃勃，Henry就全程翹埋雙手，但囡囡搵得心頭好時就合十雙手貌似哀求爸爸畀錢，Henry繼續翹埋手，仲示意囡囡問過媽咪先。媽咪點會拒絕愛女呢？笑瞇瞇幫口叫老公畀錢，結果母女夾攻下，當然任掃唔嬲。大出血後，Henry嘅指定行程係去咖啡店，每人嚟一杯外賣咖啡先打道回府。
