政壇：長毛認老氹長者開心
長毛誤以為長者卡六十歲就攞得！
長毛梁國雄從政夠激，經常以一副熱血憤青look蒲頭，但原來佢已經五十有七，尋日佢出席一個防虐老活動時，竟然流露歲月催人老嘅心態，高呼自己三年後就都可以同台下嘅老友記一樣，可以攞長者卡同享受兩蚊搭車。佢本來係想拉近同公公婆婆嘅距離，點知畀同樣出席活動嘅立法會議員陳婉嫻、梁家傑等人笑住矯正佢：「長者卡係六十五歲先攞得！」
長毛誤以為長者卡六十歲就攞得！
長毛尋日高聲自爆年齡後，台下哄堂爆笑，因為在座者都知道嘅常識，長毛好明顯唔知囉！長毛都知道老貓燒鬚，惟有以笑遮醜，尷尷尬尬個樣真係好搞笑！雖然係咁，長毛自爆年齡都氹得好多長者好開心，或者見到心境咁年輕嘅長毛，令佢哋都自覺後生啲啩！
