政壇：馮偉華形容佔中係核彈
設計圖片及對白
三名學者主催嘅「佔領中環」進入新階段，首次商討日尋日喺港大舉行，泛民各大政黨都有派代表出席，而且仲愈講愈興奮，群情洶湧下，久未露面嘅教協會長馮偉華都不甘後人，發表「佔中時機論」，話要好好把握佔中嘅時機，仲將佔中比喻為北韓揚言核試咁，希望大家明白時機嘅重要性，而唔係得把口靠嚇。馮偉華嘅言論本來係平衡過激嘅聲音，但用射核彈作比喻，唔通泛民中人都覺得佔中有失控危機呢？
設計圖片及對白
中巴混血兒碧樺依尋日都有出席。
「佔中十子」唔齊人
「佔中」首場商討日有近八百人出席，其中包括多名立法會議員同社會知名人士，期間「人人有份，永不落空」，分組參加商討日小組討論，有人首次將佔中同六四事件拉上關係，又呼籲參加者做好流血收場嘅準備，簡直係「語不驚人誓不休」。另外有人直情連佔中未發生，就諗定一旦佔中變成翻版六四嘅話，應該如何應對同準備喎！尋日「佔中十子」未有到齊，據運動發起人之一陳健民話，醫生吳錦祥、資深傳媒人徐少驊無到場，而口口聲聲愛民主嘅民主阿婆陳方安生同民主黨創黨主席李柱銘亦唔多覺眼，唯一嘅少數族裔可能要數中國巴基斯坦混血兒碧樺依。
一向文質彬彬嘅馮偉華形容，佔領中環係「核彈」，要小心使用，亂咁用或者提早用，就好似北韓之前表示會進行核試咁，講咗幾次就冇人理，所以時機係好緊要喎！疑似打算喺七一預演佔中嘅民陣一舉一動備受關注，唔知佢哋聽唔聽到馮偉華嘅憂慮呢？點都好，有政圈中人觀察佔中首場商討會後，覺得有啲激進言論好得人驚，擔心佔中會失控嘅憂慮有增無減。
