禮崩樂壞歪風盛 假公濟私無王管
衞生署助理署長蔡美儀獲豪批一年全薪假考大狀，涉及一百六十萬元公帑，引起全城嘩然。原來咁都未算吖，除咗今次之外，佢之前亦曾五次獲批有薪假期進修，真係令人懷疑佢究竟係公僕定係學生，唔通佢喺衞生署嘅職責就係讀書？
食衞局局長高永文日前仲死撐，聲稱部門首長有權根據需要，安排員工帶薪進修，尋日眼見市民反應激烈，即時轉口風話，如果員工帶薪進修半年以上，要諮詢常任秘書長喎。前言不對後語，簡直自打嘴巴。
其實問題唔在於有冇諮詢，而在於有冇制度，港府禮崩樂壞，綱紀廢弛，港產官僚巧立名目，假公濟私，諮詢又有乜用吖，最後咪又係官官相衞，照批可也。好似今次咁，明明有律政司負責提供法律意見及支援，衞生署高官都要用公帑考大狀，問你服未。按照咁嘅邏輯，衞生署唔只可以批准員工帶薪考大狀，仲可以考埋會計師、建築師甚至飛機師添吖！
有公帑找數，梗係食得唔好嘥喇。呢位衞生署女高官由九五年到二○一二年間，六次獲批全薪進修假，短則幾日，長則一年，人工愈高，進修愈多。喂，高薪厚祿仲不務正業，返學多過返工，點只係慷納稅人之慨，簡直係假公濟私喇。嗱，自我增值唔係唔得，問題係次次都攞公帑嚟增值，咁就好難向納稅人交代囉。
據講，衞生署破天荒「恩准」女高官攞一年有薪假考大狀，係前任署長林秉恩退休前拍板嘅「臨別大禮」。咁大手筆究竟所為何事，唔該審計署查一查，搞清楚兩個到底係咩關係，話唔定隨時有意外發現。大家都知呢個林秉恩正一係庸官中嘅庸官，在任九年無所作為，醜聞多多，曾經因為監管不力，搞到「發霉藥」害死病人，畀立法會「譴責」。
講開又講，衞生署嘅亂象又點只咁多吖。呢，該署一名高級醫生被踢爆秘撈，喺外面教授品酒同法國葡萄酒課程。唉，一個掛住考大狀，一個掛住秘撈，衞生署好似無王管咁，有乜可能唔七國咁亂吖！
始終都係呢句，上樑不正下樑歪。前朝曾蔭權爵士其身不正，同富豪勾勾搭搭，貪威識食，濫用公帑無所不用其極，下面有樣學樣，損公肥私蔚然成風。最離譜係，公務員做嘢一味卸膊塞責，而加薪就次次嫌少。計太一叮話齋，港府制度形同虛設，大有大貪，細有細貪，連廉署都淪為酒窖，納稅人真係冤過竇娥冤咯，叮！
