潮語「曲到圓」字面嘅意思就係終極曲線，條線曲到屈成一個圓形。要了解「曲到圓」首先要了解曲線。曲線有幾個意思，第一個意思就係有啲人做嘢或講啲嘢出嚟，原本希望有正面效果，但結局出到嚟幫唔到手不特止，仲有反效果！經典例子包括每年七一遊行前，總有一兩位親中人士出嚟叫人唔好遊行，結果反而令到市民更憤怒，反推高咗遊行人數，呢啲行為就被稱為「曲線撐遊行」。「曲線」另一個意思就係指某啲人做嘢手法非常迂迴，兜九萬幾個圈都去唔到問題嘅核心，將簡單事情複雜化，就好似事情明明係一條直線，夾硬要扭到佢變成「曲線」。呢啲都係潮語「曲線」嘅解釋。

近呢一年自從反國教運動之後，社會上多咗一批以「愛」字頭為首嘅組織，呢班「愛之軍團」所愛嘅雖然聲稱係香港，但係睇佢哋嘅做法同言論，似乎係愛我哋偉大嘅祖國多啲。尤其係佢嘅幾位首領，真係充滿住當年文革時期街道鬥委紅衞兵嘅味道。早幾日有班市民喺旺角自發悼念上年「被自殺」嘅民運人士李旺陽，期間遭到呢班「愛」之人士到場挑機，有人忍唔住同佢哋口角，之後就被幾條大漢毆打。到底係咪「愛」之人士做就未知，不過以呢班人種種流氓行為，真係曲線地令人更討厭政府及中央，唔怪得之特區民望節節下跌，唔知同呢班友嘅行動有無關，如果真係因為佢哋而影響到特區施政，咁就真係「曲到圓」！

咁「曲到圓」其實就係指啲「曲線」曲到冇人明白，曲到要講嘅人或者做嘅人自己先明白，甚至自己都唔明白，嚴格嚟講就係唔知做乜。但係偏偏依家撐政府嘅組織，無論係政黨或個別人士，都係「曲線」地令到市民更憎政府，真係愈幫愈忙，佢哋啲行為真係「曲到圓」！

第一手消息請下載on.cc東方互動iPhone/iPad/Android/Windows Phone Apps