政壇：搞搞政：高矮懸殊 困擾陳勇何俊賢

高佬賢入咗立法會之後備受關注，佢嘅身高喺議會稱霸，喺政圈都好少有挑戰者，不過都有好多問題，譬如今次佢哋見完京官後，高佬賢同陳勇本嚟齊齊企定定接受訪問，但由於兩人身高太懸殊，攝影鏡頭影高佬賢時，同一水平線上其他人就全體「被消失」，影陳勇時又會出現切咗高佬賢頭部嘅古怪畫面，兩個人惟有分開。知情人補充，當日陳勇接受訪問時，咁啱隨團團友步出會場，亦相繼圍喺陳勇身後，因此造成陳勇回應時聲勢浩大嘅場面。

高佬賢常令隔籬嘅人尷尬，今次上京事件雖然係小插曲，但圈中人睇怕都要諗諗計，點樣應付呢個高矮太懸殊嘅煩惱。