政壇：四驅車接送雷禮權型爆
全身銀色嘅雷禮權，同架銀灰色四驅車襯到絕。
九巴董事雷禮權（William）向來出位，衣着打扮夠創意外，座駕都零舍有型過人，日前下晝約兩點，官仔骨骨嘅William步出香港會所，登上一架LandRover Defender 110銀灰色越野四驅車，一身銀色西裝、銀色皮鞋嘅William，同車牌「KM8」襯到絕，睇真啲，呢個車牌似足九巴嘅英文縮寫「KMB」，右上角更印有九巴嘅標誌，認真盞鬼。
全身銀色嘅雷禮權，同架銀灰色四驅車襯到絕。
不過，四驅車配備司機，真係幾少見。我哋同William打招呼，讚佢架車好搶眼，佢豪爽一笑：「好平o架咋架車！」原來，佢架愛車只係落地幾個月。翻查資料，呢款車新車價都只係賣四十多萬元，又的確幾平嘅。嚟緊暑假，William話會飛去英國探吓愛兒，佢好感慨話，個仔八歲去英國讀書，轉眼間已經二十歲，難得William面上依然毫無歲月嘅痕迹。
