政壇：林煥光勝在死要面
設計圖片及對白
暑假將至，文憑試亦快到揭盅期，每年呢個時候，好多考生都會囉囉攣，行政會議召集人林煥光（WK）尋日出席一個電台活動，為應屆文憑試考生打氣，佢仲大講自己當年考大學嘅經歷，原來佢考咗三次試先成功跨入香港大學，支撐佢嘅係唔怕衰、唔服氣嘅心，當年更緣於一個「死要面」嘅決定改變咗佢嘅一生。
設計圖片及對白
WK喺活動中勉勵應屆文憑試考生唔好輕言放棄，佢致辭時話，回想自己當年考咗兩次大學都敗北而回，考到第三次已經好灰心，想話考唔到就出嚟做嘢算數。但到考試當日，WK考完上半場自覺零比三輸晒，諗住今次「衰硬」，步出試場就同同學仔商量，不如下半場去睇戲好過。不過，年少氣盛嘅WK自覺考咗咁多次都未試過中途放棄、淪落到要「擔梯」攞Ｈ嘅評級，佢為咗唔想張沙紙出到嚟唔好睇，把心一橫決定考埋下半場。
高永文教仔夠自由
就係呢一念之差，佢最後以四比三反勝完場，入讀香港大學社會科學系，成為天子門生，畢業後順利加入政府做政務主任（AO）喇。達到目標當然唔會只係「死要面」就掂，WK尋日冇大講自己當年點樣苦讀、點樣拚搏，但就從心出發，勸喻考生同學生哥最緊要唔好輸咗鬥心。
另外，食物及衞生局局長高永文尋日出席保良局一個領袖培育計劃活動時，就即場分享教仔心得，佢話管教仔女最緊要「自由」，畀仔女發揮潛能。佢當初都逼兩個仔學踢波，點知佢哋冇乜興趣，反而一個鍾意打羽毛球，一個學緊無伴奏式唱歌，玩得好投入，所以勉強冇幸福喎。
