SUN搞作：打橫嚟講：廢柴高官教育經費
香港衞生署「豪批」一名助理署長級女醫生，全年有薪假期（即唔做嘢卻支足薪水），用公帑一百六十萬（仲未計其他福利和津貼），讓她去律師樓實習，接受大律師訓練。
衞生署的回應，話該署因面對多項法例，及執法權力屢遭挑戰，遂須培育法律及衞生專業的專家云云。
如斯荒謬的解釋，竟得到老頂高永文局長的支持，佢更祭出「公務員事務政策機制」，說部門首長權力範圍，可按既定規矩，就職務需求批准申請！
吓！咁都得，我就要問，政府有哪個部門不涉及法律問題的呢？若個個小頭目都話要去「進修」法律知識，咁我哋香港小市民要負責幾多官員「教育經費」呢？大佬！
仲有，你哋高官個個都各自研習，有「獨立」的「法律意見」，可各自表述，咁唔使再尋求律政司意見啦！咁律政司要嚟做乜？廢咗佢啦！慳番啲錢，毋須養閒人嘛！
喂！大佬！你今日話法律有用，就排隊去讀法律，下次覺得「神打」有用，便派人去修煉茅山術數？世界知識無限嘅喎！點樣「燒滷味」啦！如何弄「大檸樂」啦！都涉及衞生署執法時的法律知識o架！高永文局長派人去學「燒滷味」咯！
黐唔黐線呀？嗰頭至有個調查，話香港無政治人才，呢頭就食豬紅屙黑屎，笑死人！用吓腦啦！吓吓講機制，你估你係機器人咩？
在此要求上述班醫生，返工前，唔好淨係驗身，要驗埋腦啦！唔該！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
