政壇：搞搞政：促查商交所建制派轉軚
設計圖片及對白
政治一日都嫌長，好似富貴黨黨魁田北俊前日突出招要求引用《立法會（權力及特權）條例》徹查商品交易所爆煲事件，本來以為今日喺內會有機會通過特權法動議，點知尋日下晝形勢逆轉，本來支持佢哋嘅建制派議員逐個跳船，以工商界為主嘅經民聯主席梁君彥講明，除咗佢因為係內會主席身份唔方便投票外，聯盟其餘五票都會反對田少，當然包括地產及建造界「大舊石」石禮謙啦！至於話要幫金融經紀出一口氣嘅金融服務界張華峰，聽聞到尋晚都被迫妥協，唔敢企喺田少嗰邊。
設計圖片及對白
據聞大舊石同張華峰都好想支持田少狙擊商交所，大舊石仲話一向本住良心講說話，但點解兩人會突然轉軚呢？聽聞佢哋尋日都無晒心機，因為聽完一位「曉以大義、明白事理」嘅高人指點後，即刻知道自己立場要投反對票。大舊石仲話因心情麻麻，尋日寧願唔開政府帳目委員會，聽到都得啖笑。
除咗兩人外，連前日唔肯表態嘅功能界別亦陸續歸邊，決定反對田少動議。計計條數，依家成個建制派只得六票支持，勾結埋二十七個泛民議員，共有三十三票，差一票才能通過，要泛民全部坐定定開會，睇嚟真係凍過水喇！
