政壇：聘書遲來肥亨冇入航空界
馬時亨（右）無緣同莊偉茵做同事。
原來商務及經濟發展局前局長馬時亨，當年大學畢業後係想加入國泰航空工作，但獲得第二輪面試機會時，佢最終都選擇加入美國大通銀行，同夢想擦肩而過。尋日肥亨出席香港優質顧客服務協會一個論壇時，就大爆當年冇入到航空公司，係因為收遲咗一封受聘通知書。
馬時亨（右）無緣同莊偉茵做同事。
話說佢當年差唔多同時間寄出求職信畀銀行同航空公司，卻因航空公司審核程序太多，結果佢先收到銀行嘅獲聘通知書，佢求工心切，於是急急應允返工。同場嘅前「國泰一姐」、中電企業發展總裁Quince莊偉茵就話如果肥亨當年加入咗國泰，可能已做咗自己嘅「波士」喇！
一般人覺得一間公司接到「投訴」一定係負面，但肥亨同Quince就唔係咁睇，佢哋話應從投訴中改善同學習，搵出對方投訴嘅原因，吸取教訓。肥亨強調顧客係公司最重要嘅資產，留得住舊顧客先會成功。
