政壇：搞搞政：促查商交所田少被責抽水
設計圖片及對白
證監會同警方已介入商交所爆煲事件，點知富貴黨黨魁田北俊尋日突出招，話今次事件分分鐘影響香港國際金融中心聲譽，要求喺聽日立法會內務委員會上引用《立法會（權力及特權）條例》徹查商交所同證監會。聽聞田少出招前，只係喺手機應用程式WhatsApp嘅建制派群組詢問議員係咪支持，當時建制派以為佢開玩笑，估唔到佢嚟真，所以尋日下晝三點幾鐘即時開會商討對策。
設計圖片及對白
結果建仔講明反對田少動議，主席譚耀宗話依家冇必要搞埋啲咁嘅嘢，仲話立會無啦啦介入事件，絕對唔係好事，擺到明不屑田少抽水。新民黨葉劉淑儀亦話權力及特權法要好高門檻，唔係郁啲就用，暗批田少亂嚟。
由於二十七名泛民議員全部支持田少動議，再加上八位建制派支持，聽日內會嘅動議好大機會通過，但去到真正有約束力嘅周三大會就要分組點票，聽聞富貴黨仲未數夠票，但就做到逼人表態嘅效果。
其實唔少建制派最嬲係覺得富貴黨唔夠票，點解仲要提動議呢？
