政壇：胡文新無計劃投資廉航
唔少富豪都會有私人投資，所以周不時都會傳出佢哋喺邊度買啲咩、入股啲咩咁。話說早兩日有報道引述東方航空消息人士話，東航同澳洲航空合作，喺香港成立嘅廉航公司捷星香港，就會引入合和作為投資者，雖然合和Thomas胡文新已經否認咗，但大家都依然好關注件事。
身處倫敦嘅Thomas尋日以視像會議，介紹合和香港房地產公開招股嘅詳情，又再有人跟進呢個傳聞，佢話合和無計劃投資廉航業務，而據佢了解亦都無私人投資嘅計劃，至於點解會有咁嘅傳聞，佢就話應該問番放料嘅人，仲話件事已經交咗畀律師研究，點知有人打爛沙盆問到篤，係咪佢同佢爸爸胡應湘在內嘅私人投資都無計劃，當佢知道個消息來源時，搞到最後佢都有啲忟忟地，回應一句：「點解人哋打銅鑼，我哋就要跳舞呢？」之後就冇人敢再問喇！
