政壇：廠商會青委 練扒龍舟操弗
王詩雅（左）同好友齊握木槳，氣勢十足。
中華廠商聯合會青年委員會一班兄弟姊妹，繼舊年參加赤柱龍舟公開男女混合賽後，今年再接再厲。眼見賽期將近，上周六下晝，副主任張永鴻等一行二十人，去扒龍舟勝地赤柱正灘練習，當日烈日當空，三十幾度高溫下，雖然大家都做足防曬措施，但練咗個幾鐘已汗流浹背，難得佢哋唔介意，用盡全力揮動木槳係咁扒。同場仲有警隊、消防等龍舟隊伍喺度練習，一眾青委不忘向對方「偷師」。
王詩雅（左）同好友齊握木槳，氣勢十足。
今次佢哋有「王牌」在手，就係由青委胡子岐擔任領隊嘞。擁有逾五年扒龍舟經驗嘅胡子岐曾喺過往賽事中摘冠，佢話覺得呢項運動好有意義，既可傳承中國傳統文化，又可鍛煉體能兼減壓，好處多多。第二度參賽嘅委員王詩雅話，曾經以為扒龍舟淨係講臂力，原來腰力都好重要，練習咗數次，條腰不知不覺間結實咗，成個人fit晒。問佢哋信心如何？大家都笑言，友誼第一，比賽第二，志在參與喎！
