政壇：搞搞政：建制派查貪湯懶懶閒
設計圖片及對白
「貪湯」前廉政專員湯顯明被踢爆任內喪買烈酒宴客，又用公帑帶女友食飯，搞到廉政公署一盤爛帳兼敗壞名聲，令人髮指。泛民早前用咗《議事規則》第二十條呈請書機制，通過成立專責委員會徹查貪湯，委員會嘅籌備小組今日開會。
設計圖片及對白
雖然專委會冇傳召權，但建制派為免蝕底都不得不派人加入。建制派「班長」葉國謙原本講過，希望委員會人數有十三人，唔好太多，建制同泛民比例就八對五。點知到上周六截止，就有十四位議員加入委員會嘅籌備小組，但建制同泛民人數竟然平分，即係有建制派議員甩底。
原本建制派每個黨派都應派人加入，點知新早餐派耍手擰頭，最後只有經民聯派兩個，富貴黨派鍾國斌加入。至於最多人嘅建仔，籌備小組名單上就只有阿謙一個。阿謙話原本叫咗本身係帳委會成員嘅陳克勤加入，但克勤仔唔記得咗。但克勤仔就否認唔記得，截止當日已向秘書處傳真文件申請加入，只係秘書處收唔到啫，而佢尋日亦再補交。
建制派對加入專委會一事懶懶閒，莫非想放生貪湯？此外，帳委會今日會展開第四度聆訊，但對象係現任廉政專員白韞六，大家要密切留意有乜關於貪湯嘅新消息喇！
