政壇：升呢做爺爺蔡堅收晒火
蔡堅係愛狗之人，連訪問都抱住隻狗上鏡，睇怕佢好快會改為抱孫做訪問喇。（資料圖片）
出名敢言同火爆嘅醫學會前會長蔡堅，經常對香港醫療大小事不平則鳴，但相信喺不久嘅將來，有一個人可以令呢位潮州怒漢收火。邊個咁巴閉？咪就係佢即將出世嘅乖孫囉！蔡醫生有兩個仔，從事金融業嘅大仔兩公婆早年定居加拿大，舊年成功「造人」。蔡醫生話大新抱預產期係今個月，暫時知道係「蛇仔」。首次升呢做「蔡爺爺」，佢連講嘢語氣都慈祥咗。
蔡堅係愛狗之人，連訪問都抱住隻狗上鏡，睇怕佢好快會改為抱孫做訪問喇。（資料圖片）
話說早幾日佢出席一個晚宴，有航空公司送出「雙人香港來回任何目的地商務客位機票」做抽獎禮品，中獎者將機票捐番出嚟拍賣。蔡醫生抱孫心切，即時出價，最高叫價至六萬四千元，但最後都係由醫院管理局主席胡定旭以八萬元投得。蔡堅話諗住投得呢兩張機票，就會日內出發去加拿大迎接孫兒，依家爭輸咗畀肥胡，只好自己撲機票喇！
