設計圖片及對白

究竟人類係咪動物呢?小學都有教,人類係哺乳類動物,而古希臘哲學家亞里士多德就話,人類係政治動物。不過,呢個問題尋日就喺立法會財經事務委員會掀起一場爭論風波。

設計圖片及對白

近期香港商品交易所主動交番個牌畀證監會,話會暫停運作,之後又爆出商交所資金不足嘅問題,令人關注證監會相關規管制度。金融服務界張華峰早前就質疑證監會喺事件上有寬待商交所主席張震遠之嫌,事關若一般證券商涉及類似財務問題,一早就會被拉人封舖。

爭相拋書包

證監會行政總裁歐達禮尋日就解釋,證券經紀同商交所呢類自動化交易服務提供者性質不一,難以比較,仲輕輕講咗一句,其實兩者係「Two different animal」。點知張華峰一聽到animal(動物)就好大反應,話業界係專業人士,唔係動物,搞到委員會主席李慧琼都尷尬叫歐達禮唔好再用animal。

法律界郭榮鏗之後話,其實亞里士多德都有句名言話「人係政治動物」,諗住打圓場叫張華峰唔使咁大反應啦!點知張華峰嘅黨友「大舊石」石禮謙見對方出動到古希臘哲學家,於是就拉埋《聖經》落水,話神按自己形象造人,所以人唔係動物喎!大舊石會後「解釋」,人係mammals(哺乳類動物)而唔係動物。咁講法,哺乳類動物同動物之間咪真係有好多討論空間?

第一手消息請下載on.cc東方互動iPhone/iPad/Android/Windows Phone Apps