語言學裏面，有一個叫「語境」的東西。何謂「語境」呢？就是一句說話（或一個「詞語」）在不同的環境、不同的語調，甚或由不同的人說出，都有不同的意思和不同的效應。

嗱！我講解得很淺白o架啦！仲唔明？好啦！舉個更淺嘅例啦！包你明解晒：慈祥的媽媽對剛準備外出的子女說：「你出街，要小心啲呀！」這是關心的叮嚀！

換一個處境，黑幫講數，指着對頭人叱喝：「你出街，要小心啲呀！」這是攞彩的恐嚇！

嗱！明未？

粵諺有曰：「嘢可以亂食，說話唔可以亂講」，除了不可以「膠噏」做大話精、講咗唔認數之外，還要有知識有學問！

嗱！仲有呀！雖然家陣係「雲端科技世代」，但說話一樣係論輩分，講身份o架！好似講「和諧」、「平反」或「自治」，你講同阿爺講，效果就天同地矣！「生活和諧」有乜唔好？「特區自治」有何不妥？偏偏就係禁語關鍵詞。

「愛國」，係任何一個人都應該擔當的責任，如同孝順父母，是天職！但若由一個國家領導人呼籲國民「愛國」，除非戰亂抗外，否則，肯定有啲景轟。「愛民」就更弔詭，世上，只有皇上君主才有「資格」愛民，普羅百姓叫隔籬屋二叔婆「愛民」？好喜劇啫！「愛國愛民」一詞，二十四年前，是一群學生跪求貪腐政府的卑微訴求，何解今天會被屈成係「香港精神」的呢？誰患上了斯德哥爾摩症候群？無學識都要食藥o架！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東方互動iPhone/iPad/Android/Windows Phone Apps