政壇：政商定格：徐家傑想挑戰演奸角
啱啱攞完最佳新演員嘅徐家傑原來最想做奸角。
前廉政公署執行處副處長徐家傑仕而優則演，早前憑喺一齣電影飾演正義凜然嘅廉署高層而爆冷獲頒金像獎最佳新演員，佢尋日笑認多得獎項帶挈佢片約不斷，身價飆升，「跟番通脹再加少少」，就連中港兩地電視台都邀請佢拍攝紀錄片。
啱啱攞完最佳新演員嘅徐家傑原來最想做奸角。
六十六歲嘅佢退而不休，除身兼香港拳擊總會榮譽主席，繼續義務教拳外，又不時以筆名喺報章雜誌撰文，前年更同死黨李慨俠籌組「全民在野黨」，銳意打造成為全港第一大黨，但要搞政黨邊有咁易吖。原來，佢近排以玩票性質走咗去拍電影，嚟緊仲會喺另一套電影飾演談判專家添。
但佢承認做來做去都係紀律部隊角色開始有啲悶，其實暗啞底最想挑戰大奸角或者心理變態嘅角色，原因係「呢個世界都係變態o架啦！」咁若果有片商邀請佢飾演前廉政專員「貪湯」湯顯明嘅醉酒一生呢？佢認為一樣有得諗，真係恨拍戲恨到發燒。
