政壇：政商定格：陳振彬贏馬捐獎金行善
陳振彬（右六）愛駒爆冷跑出，帶挈陳甘美華（右五）及一班老友高興拉頭馬。
觀塘區議會主席Bunny陳振彬尋日開心到飛起，皆因佢匹愛駒「傳奇快車」剛傷愈復出，就喺沙田馬場舉行嘅「十八區盃」中，以二十五倍賠率爆冷奪冠，仲帶挈入場主禮有「騰雞美華」之稱嘅民政事務總署署長陳甘美華拉頭馬。陳太初嘗拉頭馬滋味，興奮到舉起勝利手勢笑不停。
陳振彬（右六）愛駒爆冷跑出，帶挈陳甘美華（右五）及一班老友高興拉頭馬。
適逢Bunny係十八區區議會當值主席，可謂主場得利。賽前佢仲叫晒十八區老友，每人至少買二十蚊獨贏捧吓佢場，結果個個有錢分。佢話會將贏得嘅近四十萬元獎金，全數捐畀公開大學，支持大家終身學習。
尋日仲有場「家是香港盃」，政務司司長林鄭月娥都有入場擔任主禮嘉賓。林鄭同陳太同場現身，無論髮型、衣着、笑容都有八成似，企埋一齊儼如兩姊妹。
