政壇：搞搞政：林煥光怨政策局表現參差
設計圖片及對白
特首CY梁振英要求佢嘅團隊有政治能量，仲要令行政會議非官守成員喺政策醞釀初期可有更多參與。但行會召集人WK林煥光尋日出席電視台節目時，唔肯評論行會改革進度，佢話雖然部分政策局現有定期邀請行會成員食三文治、開午餐會簡介政策，但就表現參差。
設計圖片及對白
邊個政策局唔積極？WK無講出口，但就分階段將範圍收窄。先喺節目上點名話運輸及房屋局同佢哋嘅午餐會做得密啲，喺節目後再講，其實大部分政策局都好配合，行會成員喺環保、房屋議題上亦得到局方配合，雙方不時開會討論，仲「跟得好貼」。又話期望行會可就十五年免費教育同退休保障等較長遠嘅政策多作討論喎！
教育局局長吳克儉尋日下午出席一個活動後，對於記者有關提問好似聽唔到咁，耷低頭就走。食物及衞生局局長高永文嘅回應就積極得多，話既然有行會成員指出政策局表現參差，咁就一定有改善空間，局方未來必定會更積極爭取向行會同立法會解釋政策。
提到CY腰痛，WK就話只係傳聞，仲話CY「似乎應該仲係好fit，鬥志仲好旺盛」，而行會成員個個身經百戰，會繼續做好自己嘅崗位。
