政壇：內部矛盾「香港人」一拆三
陳梓進話「香港人」已經一分為三。
港台《城市論壇》尋日邀請泛民嘉賓討論六四，嘉賓名單多咗個「港人自決 藍色起義」（HKBRR）組織嘅發言人叫陳梓進，呢位仁兄咪就係經常高舉龍獅旗上街嘅網上群組「我哋係香港人，唔係中國人」核心成員？原來「香港人」早前內訌一拆三，除咗HKBRR，仲有一個叫「香港人優先」，咁多個名真係令人頭都大埋。
陳梓進話「香港人」已經一分為三。
陳梓進過去經常就中港矛盾發表激進言論，更多次公開高舉龍獅旗反雙非、反水貨客，帶挈「香港人」喺社交網站累積三萬幾個「讚好」。正當以為「香港人」成功上位，原來佢同幾位核心成員早已對群組「有唔方便講嘅矛盾」，已喺三月拆夥，四月另起爐灶HKBRR。
佢承認本來得五、六十人嘅「香港人」一拆三後縮到得番二十人，但無奈「政見唔同，夾硬喺埋一齊都冇意思」。佢又話HKBRR無意搞港獨，又話藍色係自然嘅顏色，唔係懷念英國國旗喎！
